Azərbaycanın Milli Qəhrəmanı Polad Həşimovla bağlı film çəkilib. Bu haqda mayın 4-də “Salnaməfilm” studiyasının rəsmisi Azad Axundov məlumat yayıb.
“Poladın izi ilə” adlı ekran əsərinin çəkilişləri Bakıda və Qəbələdə aparılıb. Filmin təqdimat mərasimi bu gün saat 19:00-da Nizami Kino Mərkəzində baş tutacaq.
General-mayor 2020-ci il iyulun 14-də Tovuz istiqamətində baş verən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən qəhrəmancasına şəhid olub. O, iyulun 15-də II Fəxri xiyabanda, polkovnik İlqar Mirzəyevlə yanaşı dəfn olunub.
2020-ci il dekabrın 9-da Prezident İlham Əliyevin Sərəncamı ilə Polad Həşimova “Azərbaycanın Milli Qəhrəmanı” adı verilib.
Qeyd edək ki, Qəbələ şəhərində Şəhidlər xiyabanının yerləşdiyi küçəyə və Bakı şəhərinin küçələrindən birinə Polad Həşimovun adı verilib. Həmçinin Türkiyənin Dəmirtaş bölgəsində Polad Həşimovun şərəfinə park salınıb.
