“Ermənistan uzun müddət mina sahələrinin xəritəsini bizə verməkdən imtina edib. Sonradan təqdim etdiklərinin isə dəqiqlik göstəricisi 25% həddindədir, bəzən ondan da azdır". Bunu dekabrın 23-də Azərbaycanın Baş naziri Əli Əsədov bildirib.
Onun sözlərinə əsasən, bu, Qarabağda və Şərqi Zəngəzurda bərpa işlərini xeyli ləngidir: “Bununla belə həmin iqtisadi rayonlarda infrastruktur layihələrinin icrası davam etdirilir, yol-nəqliyyət, enerji, su təchizatı şəbəkələri qurulur”.
Baş nazir qeyd edib ki, sözügedən ərazilərdə, həmçinin ekoloji terrorun nəticələri aradan qaldırılır, “Böyük qayıdış”ın reallaşdırılmasına hazırlıq görülür. Şəhər və kəndlərin bərpası və yenidən qurulması, müasir infrastrukturların yaradılması məqsədilə 2021-ci ilin dövlət büdcəsindən 2,2 milyard manat vəsait ayrılıb. Gələn ilin büdcəsində də həmin həcmdə vəsait nəzərdə tutulub.
