Bakıda aktiv istirahətin at belində gəzintilər, kartinq, batut, atıcılıq və digər geniş yayılmış növləri var. İnsanoid bu haqda araşdırma aparıb.
Şəhərimizin ən iri kartinq ərazisi olan Baku City Karting Su İdmanı Sarayının ərazisində yerləşir. 7 yaşından yuxarı hər kəs burada kartinqlə məşğul ola bilər. 10 dəqiqəlik yarışın qiyməti həftəiçi 25 manat, həftəsonu isə 30 manat təşkil edir.
Kvest oyunlarından paytaxtda bir neçə dənədir. Phantom H.B.Zərdabi, 74 ünvanında (“Tri Korona” Kompleksi sırasında Azpetrolun yanındakı binada) yerləşir. Burada qiymətlər kvest oyunların növündən asılı olaraq 40-90 manat arasında dəyişir. Bir komandada minimal iştirakçıların sayı 2, maksimum isə 8 nəfərdir. Portal Games-in 10 filialında 21 oyun mövcuddur. Burada qiymətlər bir nəfər üçün 18 manatdır. Bir saat davam edən kvestdə oyunçuların sayı 2-8 nəfərdir.
Batut Arena Zabitlər Bağında yerləşir. Həftənin hər günü saat 09:00-dan 23:00-dək xidmət göstərir. Məkanın qapıları 2 yaşdan yuxarı olan hər kəs üçün açıqdır. Əyləncənin 30 dəqiqəsi 10 manatdır. Dəniz Mall-da yerləşən Sky Park batut arenası həftəiçi 11:00-dan 22:00-dək, həftəsonu isə 10:00-dan 22:00-dək çalışır. 5 yaşdan yuxarı hər kəs burada əylənə bilər. 1 saatın qiyməti 30 manat təşkil edir. Hal-hazırda “Yeni İl” bayramı ilə əlaqədar burada aksiya keçirilir: həftəiçi 1 saat 20 manatdır. Qrup şəklində gələnlər üçün isə 5 manat endirim edilir.
Ömər Atçılıq Mərkəzinə (Mehdiabad qəsəbəsi) giriş həftənin hər günü 5 manat təşkil edir (3 yaşına kimi uşaqlara pulsuzdur). Bu qiymətə parklanma, gəzinti, uşaq meydançası, balıq ovu daxildir. 2 dairə at ilə gəzinti həftəiçi 3 manat, həftəsonu isə 10 manatdır. Günlük at çapma dərslərinin qiyməti 50 manat təşkil edir.
“Ulduz” metro stansiyasının yanında yerləşən Paintball Klubunda komanda yarışlarında minimum 6, maksimum 25 nəfər iştirak edə bilər. 100 gülləni 10 manata almaq olar. Həftəiçi oyunlarda iştirak etmək üçün 1 gün əvvəl, həftəsonu isə 2 gün əvvəl məkana zəng edib rezerv etmək lazımdır.
Dəniz, 28 və Gənclik mollarda yerləşən OnTop Bowling-də 1 nəfər üçün oyunun qiyməti 10 manatdır. 1 saatlıq oyunun qiyməti isə 44 manatdır və iştirakçıların sayı 5 nəfərdən çox olmamalıdır. Park Bulvardakı Bowling-də də 1 nəfər üçün oyunun qiyməti 10 manat təşkil edir.
Avropada ən böyük atıcılıq komplekslərindən biri olan Bakı Atıcılıq Mərkəzi paytaxtın Biləcəri qəsəbəsində yerləşir. Burada 25 atışın qiyməti 30 manatdır.
