Ötən gün ölkəmizdə yağan intensiv yağışlar nəticəsində paytaxt ilə yanaşı bölgələrimizdə də bir sıra küçələr və avtomobil yolları su altında qalıb. Bakı-Quba yolunda da vəziyyət eynidir. Bununla bağlı sosial şəbəkələrdə görüntülərə rast gəlmək mümkündür. İnsanlar Qubadan Bakıya qayıtmaqda çətinlik çəkdiklərini dilə gətirirlər. Yağış suyunun hələ də yollarda hərəkətə maneə olaraq qaldığı bildirilir.
Məsələ ilə bağlı İnsanoid.com-un əməkdaşı Azərbaycan Avtomobil Yolları Dövlət Agentliyinə (AAYDA) sorğu ünvanlayıb.
Azərbaycan Avtomobil Yolları Dövlət Agentliyinin (AAYDA) Mətbuat Xidmətinin rəhbəri Anar Nəcəfli İnsanoid.com-a açıqlamasında bildirib ki, yolun hərəkət hissəsində demək olar ki, yağış sularının yaratdığı fəsadlar aradan qaldırılıb:
“İntensiv yağan yağışlar nəticəsində yaranan problem aradan qaldırılır. Axşama qədər tam olaraq subasan hissələrdəki su kənarlaşdırılacaq. Hazırda Bakı-Quba yolunda maşınlar normal hərəkət edə bilir”.
Nəzrin Vahid
