Bakının Binəqədi rayonunda dörd nəfərin hücum edərək döydüyü şəxs Elnur Miskərov olub.
Teleqraf.az xəbər verir ki, o, əsasən telefon alqı-satqısı ilə məşğul olan sahibkardır.
Hadisənin qadına sataşma səbəbilə baş verdiyi iddia edilir. Təqsirləndirilənlərdən biri qadının həyat yoldaşı, digəri isə qardaşıdır. Elnur Miskərov bu iddiaları təkzib edərək məqsədli hücuma məruz qaldığını və məhkəmə qərarı ilə razı olmadığını bildirib.
Miskərovun vəkili Xaliq Hüseynov hadisənin 2023-cü ildən başlayan sosial şəbəkə mesajlaşmalarına söykəndiyini deyib. 2024-cü ilin sonlarında təqsirləndirilən şəxslər ona biznes təklifləri adı altında yaxınlaşıb və fevralın 5-də görüşə çağırıblar. Görüş zamanı Miskərovun avtomobili mühasirəyə alınıb və ona taxta parçaları ilə hücum edilib.
Hadisə ilə bağlı Cinayət Məcəlləsinin 221.3 (xuliqanlıq) maddəsi üzrə iş açılıb. Təqsirləndirilənlər saxlanılıb, lakin üç nəfər barəsində 3 aylıq ev dustaqlığı, biri isə sərbəst buraxılıb. Miskərov və vəkili bu qərara etiraz etsələr də, Bakı Apellyasiya Məhkəməsi şikayəti təmin etməyib.
