Bakıda çörək zavodunda fəhlə işləyən qadının ölümü ilə bağlı 1988-ci il təvəllüdlü Jalə Nurəliyevaya hökm oxunub. Bu haqda aprelin 18-də Qafqazinfo məlumat yayıb.
O, aylıq qazancından hər ay dövlət nəfinə 20 faiz pul tutulmaqla 2 il müddətinə islah işləri cəzasına məhkum edilib. İşçi “ehtiyatsızlıqdan adam öldürmə” maddəsilə ittiham edilib.
Qeyd edək ki, insident yanvarın 7-si Nərimanov rayonunda yerləşən “İsrafiloğlu” MMC-yə məxsus “Nur” zavodunda baş verib.
Mərhum xəmir qarışdıran qurğunun alt hissəsini təmizləyərkən həmin qurğu digər əməkdaş tərəfindən işə salınıb. Nəticədə qadının qolu qarışdırıcının arasında qalıb və o, aldığı xəsarətlərdən hadisə yerində həlak olub.
