Bakıda əsən güclü külək səbəbindən xəsarət alan 2 nəfər (kişi) Kliniki Tibbi Mərkəzə (KTM) gətirilib. Bu barədə aprelin 21-də Mərkəzdən məlumat verilib.
Qaradağ sakini, 34 yaşlı şəxs Sahil qəsəbəsində yerləşən iş yerində olarkən xəsarət alıb. Külək səbəbindən darvaza onun üzərinə aşıb. Ona ilkin tibbi yardım göstərilib və bir müddət sonra ambulator müalicəyə buraxılıb.
Digər xəsarət alan Lökbatan qəsəbə sakini, 60 yaşlı tır sürücüsüdür. Sürücünün dediyinə görə, tırın qapısını açarkən külək qapını əlindən alıb və o da yıxılaraq xəsarət alıb. Hadisə nəticəsində kəllə-beyin travması alan şəxs hazırda xəstəxanada müalicəsini davam etdirir.
