Bakıda polis əməkdaşları tərəfindən saxlanılarkən üzərində olan qumbaranın partlaması nəticəsində ölən şəxslə birgə tutulmuş şəxsə hökm oxunub. Elman Qurbanov 8 il 6 ay azadlıqdan məhrum olunub. Bu haqda aprelin 15-də APA məlumat yayıb.
O, cəzasını ciddi rejimli cəzaçəkmə müəssisəsində çəkəcək.
Hadisə ötən il iyul ayının 27-də Yasamal rayonunda baş verib. Rəsmi məlumata əsasən, narkotiklərin dövriyyəsində şubhəli bilinən şəxsin avtomobili polis tərəfindən saxlanılıb. Lakin o, tabesizlik göstərərək qaçmağa cəhd göstərib və bu zaman üzərində olan qumbara partlayıb.
Nəticədə həmin vətəndaş həlak olub, 4 polis əməkdaşı isə xəsarət alıb. Yaralanan kapitan Elçin Səfərov bir neçə gün sonra xəstəxanada vəfat edib.
Maşındakı əvvəllər soyğunçuluq cinayətinə görə məhkum olunmuş sərnişin hadisə yerindən qaçarkən tutulub. Axtarış zamanı onun üzərindən külli miqdarda narkotik, avtomobildən isə silah-sursat tapılıb.
