“Balacans Agro Food” MMC və Azərbaycan İnvestisiya Şirkəti (AİŞ) arasında investisiya müqaviləsi imzalanıb. Bu barədə 6 dekabr tarixində İqtisadiyyat Nazirliyinin rəsmi səhifəsində məlumat verilib.
Müqaviləyə görə, AİŞ istehsal xətlərinin genişləndirilməsi, müxtəlif salat konservləri, kompot, cem-mürəbbə, meyvəqurutma və s. kimi yeni investisiya istiqamətlərinin reallaşdırılmasında iştirak edəcək. Layihənin həyata keçirilməsi üçün 4,7 milyon manat investisiya tələb olunur və nəticədə 100-dək yeni iş yerinin yaradılması nəzərdə tutulub. AİŞ bu layihədə payçılıq prinsipi ilə iştirak edəcək. İstehsal edilən məhsulların yerli və xarici bazarlarda satılması nəzərdə tutulub.
“Balacans Agro Food” MMC 2011-ci ildə yaradılıb. Şirkətin istehsalat bazası 1969-cu ildə yaranıb. Şirkət qida məhsullarının istehsalı, qablaşdırılması, satışı, meyvə bağları və birillik əkin, soyuducu anbar və enerji içkilərinin qablaşdırılması sahələrində fəaliyyət göstərir.
Azərbaycan İnvestisiya Şirkəti 2006-cı ildə yaradılıb. Şirkətin fəaliyyət istiqamətlərinə Azərbaycanda həyata keçirilən layihələrə investisiya qoymaq, birbaşa investisiyaların, istedadların və texnologiyaların ölkəyə cəlb etmək, qeyri-neft sektorunun inkişafına töhfə vermək və idxal əvəzləyici proseslərə dəstək verməkdir.
