Biləsuvar rayon Fazil Hökməliyev adına Günəşli kənd ümumi orta məktəbinin direktorunun qanunsuz şəkildə işçiləri işdən azad etdiyi iddia olunur.
Bununla bağlı Cenublu.az saytına Alim Həmidli tərəfindən şikayət daxil olub.
Şikayətçi Günəşli kənd ümui orta məktəbinin direktoru Nərmin Nəbiyevanın qanunsuzluq etdiyini dilə gətirib:
“Həmin məktəbdə direktor müavini vəzifəsində çalışırdım. Məni işdən azad etdi və hazırda iş məhkəmədədir. İşdən azad ediləndən sonra Dövlət Əmək Müfəttişliyi Xidmətinə müraciət etdim və direktor son haqq-hesab pulunu düzgün və vaxtında ödəmədiyi, yəni xitam prosesini pozduğu üçün 700 manat cərimə edildi və buna görə qurum onun haqqında inzibati tənbeh tədbiri gördü”.
Bundan əlavə direktor Nərmin Nəbiyeva işlədiyi iki il ərzində məktəbdə bir neçə dəfə qanunsuz olaraq işçiləri işdən azad edib.
“Məktəbdə xadimə vəzifəsində çalışan bir işçini işdən azad etdiyi üçün Əmək Müfəttişliyi Xidməti onu 1000 manat cərimə etdi. Buna görə də direktor həmin şəxsi işinə bərpa etmək məcburiyyətində qaldı. Daha sonra digər bir xadiməni də qanunsuz işdən azad etdi və bunun üçün də Dövlət Əmək Müfəttişliyi Xidməti Nərmin Nəbiyevanı 1500 manat cərimə etdi və işçinin işə bərpa qərarını verdi.
Lakin direktor həmin işçini işinə bərpa etmədi və məhkəməyə müraciət etdi. Biləsuvar rayon məhkəməsi həmin şəxsin işinə bərpa olunması ilə bağlı qərar verdi, lakin direktor yenə həmin işçini işinə bərpa etmədi və iş hazırda Apellyasiya məhkəməsindədir”, – şikayətçi deyib.
A.Həmidli qeyd edib ki, təkcə bu ilin yanvar ayının 27-si və fevralın 10-da direktor Əmək Müfəttişliyi Xidməti tərəfindən qanunsuz əməllərinə görə, iki dəfə olmaqla 1700 manat cərimə olunub:
“Ümumilikdə isə, 4 inzibati protokolla 4200 manat cərimə tətbiq olunub. Dəfələrlə mən və digər şəxslər Şirvan-Salyan Regional Təhsil İdarəsi, Biləsuvar rayonu üzrə təhsil sektoruna müraciət etsək də, bu qədər nöqsanı, qanunsuz əməlləri olan direktor vəzifədə saxlanılır. Bütün şikayətlər faydasız qaldığı üçün mən də direktoru işə götürən tərəf kimi Məktəbəqədər və Ümumi Təhsil üzrə Dövlət Agentliyini məhkəməyə vermək məcburiyyətində qaldım”.
Şikayət ilə bağlı Biləsuvar rayon Fazil Hökməliyev adına Günəşli kənd ümumi orta məktəbinin direktoru Nərmin Nəbiyeva ilə əlaqə saxladıq.
O, bildirdi ki, Alim Həmidli məktəbdə müddətli əmək müqaviləsi ilə çalışıb. Əmək müqaviləsinin müddəti bitəndə işinə xitam verilib:
“Hazırda proses məhkəmədə davam edir. Mən Azərbaycan Qanunvericiliyinə uyğun olaraq xitam prosesini həyata keçirmişəm. Səhv etmişəm, düz etmişəm – məhkəmə qərar verəcək. Alim Həmidli bir il müqavilə ilə xidmət edib. Mənim həmin şəxslə heç bir konfliktim olmayıb. Müqaviləni bağlayan tərəfin biri mən, digər odur.
Kollektiv ilə problemi olub. Sizə deyə bilmərəm. Rayon ictimaiyyətinin bildiyi problemləri, uyğun olmayan məsələlər var idi. Belə şəxslə çalışmaq istəmirdim. Müqavilə bitəndə xitam verdim. İstənilən şəxsdən soruşa bilərsiniz. Əmək Müfəttişliyi Xidmətinin məni cərimə etməsi məsələsinə gəlincə isə bu həmin şəxslərlə mənim aramda olan məsələdir, bunun Alim Həmidli ilə heç bir əlaqəsi yoxdur. Kollektiv onu istəmirdi”.
Nəzrin Vahid
