Belçikanın paytaxtı Brüsseldə dekabrın 14-də Azərbaycan Prezidenti İlham Əliyev, Avropa İttifaqı (Aİ) Şurasının Prezidenti Şarl Mişel və Ermənistanın Baş naziri Nikol Paşinyan arasında görüş keçirilib.
Görüşdə Aİ-nın işğaldan azad edilmiş ərazilərdə minalardan təmizlənməsində Azərbaycana texniki yardım göstərməyə hazır olduğu bildirilib. Ermənistan-Azərbaycan dövlət sərhədinin delimitasiyası ilə bağlı hər iki tərəf müvəqqəti işçi qrupun yaradılması ilə bağlı razılıq verib. Həmçinin Ermənistan öz ərazisindən dəmir yolunun çəkilişinə tezliklə start verəcəyi ilə bağlı öhdəlik götürüb. Dəmir yollarında gömrük və sərhəd nəzarətinin qarşılıqlılıq prinsipi əsasında təşkil olunacaq.
Üçtərəfli görüşün yekunu ilə bağlı Aİ tərəfindən bəyanat yayılıb. Şarl Mişelin bəyanatında münaqişədən əziyyət çəkmiş insanlara, xüsusilə yenidənqurma fəaliyyətlərinə dəstək ifadə edilib. Qeyd olunub ki, Aİ sərhədlərin demarkasiyası və delimitasiyası ilə bağlı məşvərətçi statusda dəstək verə bilər.
Brüsseldə İlham Əliyev və Nikol Paşinyan arasında da görüş keçirilib. Bu, 44 günlük Vətən müharibəsindən sonra iki ölkə rəhbərləri arasında ilk təkbətək görüş olub.
