Azərbaycanın 1991-ci ildə sənədlə müstəqillik əldə etməsinə baxmayaraq, respublikada rəhbərlik uğrunda ayrı-ayrı şəxslər və qruplar arasında mübarizə gedirdi. Bu isə ölkədə siyasi hakimiyyət boşluğunu hiss etdirirdi. Bundan əlavə, Ermənistanla münaqişə vəziyyəti daha da gərginləşdirirdi.
Həmin zamanlar qanunsuz silahlı dəstələrin yaradılması Azərbaycanda vətəndaş müharibəsinə gətirib çıxardı. Belə bir şəraitdə Azərbaycan xalqı sınanmış lideri Heydər Əliyevin hakimiyyətə qayıtmağı ilə bağlı təkliflər irəli sürməyə başladı. Hər gün Azərbaycanın müxtəlif yerlərindən Naxçıvana nümayəndələr yollanır, teleqramlar göndərilir, Heydər Əliyev hakimiyyətə gəlməyə və xalqa kömək etməyə dəvət edilirdi. 9 iyun 1993-cü ildə Heydər Əliyev Bakıya gəldi və çox az zamanda Azərbaycanda yaranmış vətəndaş müharibəsinin qarşısını ala bildi.
15 iyun 1993-cü ildə Azərbaycan Respublikası Milli Məclisinin iclası zamanı Heydər Əliyev Ali Sovetin sədri seçildi. Beləliklə, həmin gün Milli Qurtuluş Günü kimi tarixə düşdü. Bayram 1997-ci ildən dövlət səviyyəsində keçirilir.
