Rəşad Saləddin oğlu Atakişiyev 7 yanvar 1985-ci ildə Şəmkir rayonunun Qılıncbəyli kəndində anadan olub.
Atakişiyev ilk təhsilini Samux rayonunun Alabaşlı kəndindəki orta məktəbdə alıb. Sonra isə o, Azərbaycan Silahlı Qüvvələrinin Hərbi Akademiyasına daxil olub. 2002-2006-cı illərdə Azərbaycan Ali Hərbi Təyyarəçilik Məktəbində oxuyub. O, daha sonra pilot kimi fəaliyyətə başlayıb, polkovnik-leytenant rütbəsinə qədər yüksəlib. Rəşad Atakişiyev Azərbaycan Hərbi Hava Qüvvələrinin ən peşəkar pilotlarından biri olub.
O, 3 dəfə Konya şəhərində keçirilən Azərbaycan və Türkiyə Hərbi Hava Qüvvələrinin “Turaz Qartalı” adlı təlimlərində iştirak edib.
Rəşad Atakişiyev 2016-cı ilin aprel döyüşlərinin iştirakçısı olub. Döyuşlərin birində Atakişiyev MİQ-29-la səs effekti yaratmaqla düşməni çaşdırmağa çalışıb. Lakin həmin an ermənilər qurğunu söndürmək istəyiblər və Rəşad sistemin işləmədiyini görüb. O, havada manevr edərək, sistemi yenidən işə salmağı bacarıb.
Rəşad Atakişiyev 24 iyul 2019-cu ildə gecə vaxtı təlim-məşq uçuşları keçirən zaman idarə etdiyi təyyarədə Xəzər dənizinə düşüb. Qəza nəticəsində Atakişiyev dünyasını dəyişib. Təyyarə və pilotun axtarışları üçün Türkiyə və Rusiyadan mütəxəssislər, həmçinin müxtəlif avadanlıqlar cəlb olunub. 19 avqust 2019-cu ildə təyyarənin qara qutusu, bir gün sonra isə pilotun nəşi tapılıb. 21 avqust 2019-cu ildə Rəşad Atakişiyev İkinci Fəxri xiyabanda dəfn olunub.
Atakişiyev ölümündən sonra, 28 dekabr 2019-cu ildə “Şücaətə görə” medalı ilə təltif edilib. Bundan əlavə, onun haqqında “Sonuncu uçuş” adlı sənədli film çəkilib.
