Nəsibə Cahangir qızı Zeynalova 20 aprel 1916-cı ildə Bakı şəhərində anadan olub. Onun atası Cahangir Zeynalov həm tanınmış tacir, həm də aktyor olub.
Nəsibə xanım 1934-cü ildən mövsümi fəaliyyət göstərən səyyar Kolxoz və Sovxoz Teatrında aktrisa işləməyə başlayıb. Bu teatr Bakıda truppa toplayır, özünə repertuar qurur, aprel ayından oktyabr ayınadək kənd təsərrüfatının qızğın çağında rayonlara gedib tamaşalar nümayiş etdirirdi. 1937-ci ildən isə o, Bakıda çalışıb.
Aktrisa 1938-ci ildə Azərbaycan Dövlət Musiqili Komediya Teatrının truppasına birinci dərəcəli aktrisa kimi götürülüb. Həmin il Bakı Teatr Məktəbinə daxil olaraq aktyorluq təhsili alıb.
Onun məşhur obrazları “Qayınana”da Cənnət xala, “Ögey ana”da Fatmanisə, “Böyük dayaq”da Telli, “Ulduz”da Züleyxa, “Molla Fətəlinin sərgüzəşti”ndə Gülsüm idi.
Aktrisa musiqili teatrın inkişafında xidmətlərinə görə 1960-cı ildə Azərbaycan Respublikasının əməkdar artisti, 1967-ci ildə xalq artisti fəxri adlarına layiq görülüb.
1974-cü ildə “Hicran” musiqili komediyasındakı Qızbacı roluna görə Nəsibə Zeynalova Azərbaycanın Dövlət Mükafatı laureatı olub. Həmin ildə rejissor Rauf Kazımovski onun yaradıcılığı haqqında “Aktrisanın təbəssümü” filmini çəkib.
Nəsibə Zeynalova 10 mart 2004-cü ildə Bakıda vəfat edib və Birinci Fəxri xiyabanda dəfn olunub.
