Bugün, noyabrın 25-də Kəlbəcər rayonunun Ermənistan Silahlı Qüvvələrinin işğalından azad edilməsindən bir il ötür.
Ötən ilin noyabrın 10-da Azərbaycan Prezidenti, Ermənistan Baş naziri və Rusiya Prezidentinin imzaladığı üçtərəfli Bəyanata əsasən, Kəlbəcər noyabrın 15-də Azərbaycana qaytarılmalı idi. Lakin qarşı tərəf rayonu boşaltmaq üçün Rusiya vasitəsilə Azərbaycandan 10 gün vaxt istəyib.
Kəlbəcər rayonu 1993-cü il aprelin 2-də işğal edilib. Nəticədə rayonun 53 min nəfərdən çox əhalisi evlərini tərk etməyə məcbur qalıb. İşğal zamanı 511 dinc sakin öldürülüb, 321 adam əsir götürülüb və itkin düşüb.
Kəlbəcər Azərbaycanın işğal olunmuş rayonları arasında ərazicə ən böyüyüdür. 27 il ərzində rayon mərkəzi, 150-yə yaxın kənd, onlarca tarixi-mədəniyyət abidəsi, “İstisu” sanatoriyası və digər obyektlər ermənilər tərəfindən məhv edilib.
Rayonun işğalından sonra BMT Təhlükəsizlik Şurası 822 saylı Qətnamə qəbul edib. Qətnamədə erməni qüvvələrinin Azərbaycanın rayonlarından dərhal çıxarılması tələb olunub. Lakin həmin sənəddə irəli gələn hər hansı öhdəlik yerinə yetirilməyib.
