Əliyar Əliyev Yusif oğlu 14 dekabr 1957-ci ildə Qubadlının Qazyan kəndində anadan olub.
O, kənd məktəbində təhsil alıb, 1979-cu ildə Azərbaycan Dövlət Bədən Tərbiyəsi İnstitutunu bitirib. Əliyar bir müddət Qubadlının Dondarlı kənd məktəbində idman müəllimi çalışıb. O, 1980-1982-ci illərdə hərbi xidmətdə olub.
Birinci Qarabağ Müharibəsi başlayanda Əliyar Əliyev könüllü orduya yazılıb. O, Qubadlıda könüllülərdən ibarət tabor təşkil etmişdir. Taborun könüllülərin çoxu Əliyarın rəhbərlik etdiyi idman cəmiyyətinin üzvləri idi. Bu səbəbdən onu “Pəhləvanlar taboru” kimi də adlandırırdılar.
Əliyar Əliyev 1992-ci ildə taborun kəşfiyyat bölməsinin komandiri təyin olunur. Daha sonra taborun rəhbərliyi ona həvalə olunub. Əliyar Başarat, Susuz dağ, Suarası mövqelərini ələ keçirərkən fərqlənib.
Əliyarın rəhbərlik etdiyi alayın topçuları Xocalı soyqırımından sonra Gorusda erməniləri ağır itkilərə məruz qoyub. Bu haqda Moskva və İrəvan KİV-ləri də yazırdı. Buna görə, Ermənistanda üç gün matəm elan edilmişdir, İrəvanda keçirilən mitinqlərdə Əliyar Əliyevə və onun üç döyüşçüsünə ölüm hökmü çıxarılmışdır.
1992-ci ilin aprel ayında ermənilər Qubadlının sərhəd kəndlərinə hücüm edir. Əliyar onları mühasirəyə alır, 11 erməni əsgərini öldürərək, meyidlərini azərbaycanlı əsirlərə dəyişir. Həmin ilin 24 iyununda 3 vertolyot Qubadlını bombalamağa gəlir, Əliyarın döyüşçüləri isə onları vurub salır.
1992-ci ilin payızında Əliyar Əliyev 40 döyüşçü ilə Laçının 40-a yaxın kəndini 4 gün ərzində ermənilərdən azad edir.
Əliyar Əliyev 3 oktyabr 1992-ci ildə Laçının iki kilometrliyində, “Tikanlı zəmi” yüksəkliyi uğrunda gedən döyüşdə şəhid olub. O, Qubadlı rayonunun Qəzyan kəndində dəfn olunub və Prezidentin sərəncamı ilə ölümündən sonra Azərbaycanın Milli Qəhrəmanı fəxri adı verilib.
Qubadlı azad edildikdən sonra Milli Qəhrəmanımızın qəbri bərpa olunub, məzar daşı hazırlanaraq ətrafı səliqəyə salınıb.
