Mehdi Hənifə oğlu Hüseynzadə 22 dekabr 1918-ci ildə Bakıda, Novxanı qəsəbəsində anadan olub. O, 1936-cı ildə Bakıda rəssamlıq məktəbini, 1940-cı ildə isə Leninqrad Xarici Dillər İnstitutunu bitirib və Bakıya qayıdıb.
Alman faşistlərinin Sovet İttifaqına hücumu başlayanda, Mehdi könüllü olaraq cəbhəyə yazılıb. O, 1942-ci ildə Tbilisi hərbi piyada məktəbini bitirdikdən sonra, cəbhəyə yollanıb, Stalinqrad döyüşündə iştirak edib. Mehdi Kalaç şəhəri yaxınlığında döyüşlərdə yaralanaraq, faşistlərə əsir düşüb. 1943-cü ildə Mehdi başqa hərbi əsirlərlə birgə qaçaraq, partizan dəstəsinə qoşulub. Burada Hüseyzadə “Mixaylo” ləqəbini alıb və kəşfiyyatçı kimi fəaliyyət göstərib.
Qoşulduğu partizan dəstəsi Mehdinin iştirakı ilə bir çox uğurlu əməliyyatlar keçirib: onlar həbsxanalara hücum edərək sovet əsgərlərini azad ediblər, qiymətli topoqrafik xəritələri ələ keçiriblər, kazarmalarda, kinoteatrlarda partlayışlar törədiblər və xeyli faşist hərbi texnikasını məhv ediblər. Mixaylonun tutulması və öldürülməsi üçün alman komandanlığı 400 min marka məbləğində mükafat vəd etmişdir.
Mehdi Hüseynzadə 2 (16) noyabr 1944-cü ildə Sloveniyanın Vitovle kəndi yaxınlığında faşistlərin hücumu zamanı həlak olub. O, indiki Sloveniya ərazisində yerləşən Çepovani kəndində dəfn edilib.
1957-ci ildə faşistlərə qarşı mübarizədə göstərdiyi qəhrəmanlığa görə, Mehdi Hüseynzadəyə ölümündən sonra “Sovet İttifaqı Qəhrəmanı” adı verilib.
Azərbaycan yazıçıları İmran Qasımov və Həsən Səyidbəyli “Uzaq sahillərdə” povestində Mehdi Hüseynzadənin bədii surətini yaratmışdırlar. Povestin ssenarisi əsasında isə çəkilmiş “Uzaq sahillərdə” filmi Mixaylonun qəhrəmanlığından bəhs edir.
2018-ci ilin iyunun 23-də Azərbaycan Prezidenti İlham Əliyev Mehdi Hüseynzadənin 100 illik yubileyinin keçirilməsi haqqında sərəncam imzalamışdır.
