Bugün Azərbaycan Prezidentinin 60 illik yubileyidir. İlham Heydər oğlu Əliyev 24 dekabr 1961-ci ildə Bakıda anadan olub.
O, 1967-1977-ci illərdə Bakı şəhərinin 6 saylı orta məktəbində təhsil alıb. İlham Əliyev 1977-ci ildə Moskva Dövlət Beynəlxalq Münasibətlər İnstitutuna daxil olub, 1982-ci ildə isə təhsilini həmin institutun aspiranturasında davam etdirib. Əliyev 1985-1990-cı illərdə təhsil aldığı müəssisədə müəllim kimi çalışıb.
İlham Əliyev 1991-1994-cü illərdə özəl biznes sahəsində işləyib və bir neçə istehsal-kommersiya müəssisələrinə rəhbərlik edib.
1994-cü ildən 2003-cü ilin avqust ayına qədər Azərbaycan Dövlət Neft Şirkətinin vitse-prezidenti və Birinci vitse-prezidenti vəzifələrində işləyib. İlham Əliyev 1995-ci və 2000-ci illərdə Milli Məclisə üzv seçilib və 1997-ci ildən Azərbaycan Milli Olimpiya Komitəsinin prezidentidir.
Əliyev 1999-cu ildə Yeni Azərbaycan Partiyası sədrinin müavini, 2001-ci ildə sədrin birinci müavini, 2005-ci ildə isə partiyanın sədri seçilib.
2001-2003-cü illərdə Avropa Şurası Parlament Assambleyasında (AŞPA) Azərbaycan Respublikası Milli Məclisinin nümayəndə heyətinin rəhbəri olub. 2003-cü ilin yanvar ayında İlham Əliyev AŞPA-nın sədrinin müavini və Büro üzvü seçilib.
4 avqust 2003-cü ildə İlham Əliyev Azərbaycan Respublikasının Baş naziri təyin olunub. 15 oktyabr 2003-cü ildə Azərbaycan Respublikasının Prezidenti seçilib. 2008, 2013 və 2018-ci illərdə keçirilən prezident seçkilərində də İlham Əliyev qələbə qazanıb.
Dövlət başçısının rəhbərliyi altında Azərbaycan Ordusu 27 sentyabr 2020-ci il tarixindən başlayaraq 44 gün ərzində Azərbaycan ərazilərini erməni işğalından azad edib.
İlham Əliyev bir çox təltiflərə və fəxri adlara layiq görülüb. Ən son 12 noyabr 2021-ci ildə İstanbulda keçirilən Türkdilli Dövlətlərin Əməkdaşlıq Şurasının VIII Zirvə Görüşündə, Türkiyə Prezidenti Rəcəb Tayyib Ərdoğan tərəfindən “Türk Dünyasının Ali Ordeni” ilə təltif olunmuşdur.
