Bugün, dekabrın 10-da Azərbaycanın Vətən müharibəsində Qələbəsinə həsr olunmuş Zəfər paradının keçirilməsindən 1 il ötür. Dövlət başçısı İlham Əliyev və Türkiyə Prezidenti Rəcəb Tayyib Ərdoğanın iştirak etdiyi paradda 3 000 nəfərdən artıq şəxsi heyət, 150-dək hərbi texnika nümayiş olunub.
2020-ci il sentyabrın 27-də Ermənistan ordusunun yaşayış məntəqələrimizə atəş açdığı üçün Azərbaycan cəbhə boyu əks-hücum əməliyyatına başlayıb. Qarşıdurmalar qısa müddətdə İkinci Qarabağ müharibəsinə çevrilib.
44 gün davam edən müharibə ərzində oktyabrın 4-də Cəbrayıl, oktyabrın 17-də Füzuli, oktyabrın 20-də Zəngilan, oktyabrın 25-də Qubadlı və noyabrın 8-də Şuşa şəhəri işğaldan azad edilib. Şuşanın işğaldan azad olunması müharibənin taleyini həll edib. Ertəsi gün daha 70-dən çox kənd azad edilib və nəticədə Ermənistan Azərbaycanın şərtlərini qəbul etməyə məcbur olub.
Noyabrın 10-da gecə Ermənistan, Azərbaycan və Rusiya Qarabağda hərbi əməliyyatların bitməsi və atəşkəs barədə birgə bəyanat imzalayıb. Bəyanata əsasən, noyabrın 20-də Ağdam, 25-də Kəlbəcər, dekabrın 1-də isə Laçın rayonları siyasi yolla azad edilib.
