Dünyanın ən böyük ixracatçısı olan Qazaxıstan da buğda ixracatına qadağalar tətbiq edir. Bundan əlavə, xaricə buğda satan Rusiya və eksport ilə ilk beşliyə daxil olan Ukrayna da satışı dayandırmışdı. Baş verənlər fonunda BMT dünyada 1,7 milyard insanın aclıq təhlükəsi ilə üz-üzə qalacağı barədə xəbərdarlıq edib. Bütün bunlar Azərbaycana təsir edəcəkmi və çorəyin qiyməti arta bilərmi? Buna Milli Məclisin deputatı Vüqar Bayramov aydınlıq gətirib.
Deputat statistikaya istinadən bildirib ki, Azərbaycanda buğdaya olan tələbin 40%-i idxal hesabına ödənilir. Onun sözlərinə görə, idxalda ən böyük paya 80%-lə Rusiya sahib idi: “Qazaxıstan da buğda idxal etdiyimiz ölkələr siyahısında olsa da, Rusiya ilə müqayisədə kiçik çəkiyə malik idi”.
Vüqar Bayramov bildirib ki, Nazirlər Kabinetinin məlumatına görə, strateji ərzaq məhsulları ilə bağlı qıtlıq təhlükəsi yoxdur. “Təbii ki, ən uyğun yol idxaldan asılılığın aradan qaldırılmasıdır”, - deyə o əlavə edib. Belə ki, 2021-ci ildə ölkədə 595 min hektar ərazidə buğda əkilib. Deputat işğaldan azad olunan ərazilərimizin də buğda istehsalına xüsusi töhfə verəcəyini vurğulayıb.
Onun sözlərinə görə, hökumət anti-inflyasiya tədbirləri çərçivəsində strateji ərzaq məhsullarının qiymətlərini optimallaşdırmağa çalışır. Artıq Hindistandan buğda idxalı ilə bağlı danışıqlar aparılır. Ukraynadakı müharibənin dünya bazarında yaratdığı qeyri-müəyyənlik isə dərinləşməkdədir.
