“Ermənistan Azərbaycanın işğaldan azad edilmiş ərazilərinə yüz minlərlə mina yerləşdirib və həmin minalar günahsız insanların həyatına son qoymağa davam edir”. Bunu Azərbaycanın xarici işlər naziri Ceyhun Bayramov Cenevrədə BMT-nin İnsan Hüquqları Şurasının 54-cü sessiyasının 5-ci iclasında çıxışı zamanı deyib.
Bu barədə 13 sentyabr tarixində Report xəbər verib.
“Bundan başqa, Ermənistan ərazilərdə aparılan yenidənqurma və bərpa işlərini çətinləşdirir, azərbaycanlıların yurdlarına qayıtma hüquqlarına mane olur. Ermənistan insan hüquqları ilə bağlı öhdəliklərini yerinə yetirmir”,- nazir qeyd edib.
XİN başçısı vurğulayıb ki, 2020-ci ilin noyabrında imzalanmış üçtərəfli bəyanatdan bəri 306 nəfər mina qurbanı olub: “Ümumilikdə isə 3 300 nəfərdən çox azərbaycanlı ötən 30 il ərzində mina qurbanı olub”.
C.Bayramov Birinci Qarabağ müharibəsi zamanı itkin düşmüş azərbaycanlıların taleyi barədə Ermənistanın məlumat verməkdən yayınmasına da diqqət çəkib:
“Digər vacib məsələ təxminən 4 000 azərbaycanlının 1990-cı illərdəki müharibə zamanı itkin düşməsidir. Həmin şəxslərin taleyi haqqında məlumatları açıqlaması ilə bağlı çağırışlarımıza Ermənistan beynəlxalq hüququ heçə sayaraq məhəl qoymur. Ermənistan insan hüquqları ilə bağlı öhdəliklərini yerinə yetirmir”.
