Cəbrayıla “Mersedes” markalı yük avtomobili ilə hərəkət edən və polisə tabesizlik göstərən sərxoş sürücü saxlanılıb. Bu barədə dekabrın 13-də Daxili İşlər Nazirliyindən məlumat verilib.
Məlumata görə, rayonun Balyand kəndi ərazisindəki postda sözügedən avtomobilə “Saxla” işarəsi verilib. Sürücü qanuni göstərişə məhəl qoymayaraq, hərəkəti davam etdirib. Daha sonra polis əməkdaşları tərəfindən həmin avtomobilin saxlanılması təmin edilib.
Aparılan araşdırmalarla sürücünün Abşeron rayon sakini Elşən Abbasov olduğu və sərxoş vəziyyətdə avtomobili idarə etdiyi müəyyən edilib. O, 30 sutka inzibati həbs edilib və onun sürücülük hüququ 1 il müddətinə məhdudlaşdırılıb.
