2022-ci ildən etibarən əhalinin əmək haqqısından icbari tibbi sığorta üçün 1% deyil, 2% vəsait tutulacaq. Bəs bu dəyişikliyin əhali üçün nə kimi faydası olacaq? Bununla bağlı deputat Soltan Məmmədov 6 dekabr tarixində Xəzər Xəbərə fikir bildirib.
Onun sözlərinə görə, bu dəyişikliyin əsas məqsədi keçmişdə mövcud olan qeyri-rəsmi ödəmələrin qarşısını almaqdır.
“Vətəndaş öz ərazisindəki tibb müəssisəsinə müraciət edərək digər tibb müəssisəsinə göndəriş ala bilər. Həmçinin öz arzusu ilə yaşayış yerindən kənar tibb müəssisəsinə müraciət etdikdə əlavə ödəniş tələb olunmayacaq”, - deyə deputat əlavə edib.
Azərbaycanda icbari tibbi sığorta haqlarının toplanılmasına 1 yanvar 2021-ci il tarixindən başlanılıb. Sığortaolunan yaşayış yeri üzrə poliklinika, Ailə Sağlamlıq Mərkəzi və kənd həkim məntəqəsinə müraciət edə bilər. Müraciət edərkən şəxsiyyət vəsiqəsini təqdim etmək mütləqdir. Sığortaolunanlar Xidmətlər Zərfində qeyd edilən tibbi xidmətlərdən yararlana bilərlər. Zərfə 2550 sayda müxtəlif tibbi xidmət daxildir. Sözügedən zərfə kosmetik prosedurlar, plastik cərrahiyyə, stomatoloji xidmət, orqan transplantasiyası kimi prosedurlar daxil deyil.
Əməkhaqqıdan və ya gəlirdən tutulan icbari tibbi sığorta haqlarının məbləğini kalkulyator vasitəsilə hesablamaq mümkündür.
