Azərbaycanda 2021-ci ilin ilk 9 ayı ərzində 14 186 nəfər icbari tibbi sığorta çərçivəsində özəl xəstəxanalara yönləndirilib. Bu barədə Report 10 dekabr tarixində İcbari Tibbi Sığorta üzrə Dövlət Agentliyinə istinadən məlumat verib.
Məlumata əsasən, həmin şəxslərdən 368 nəfəri uşaqlardır. Ürək və damar cərrahiyyəsi/kardiologiya üzrə 4 mindən çox, oftalmologiya üzrə 2 mindən çox və urologiya üzrə 900-dən çox şəxs əməliyyat olunub.
Vətəndaşa TƏBİB-in tabeliyində olan dövlət tibb müəssisəsi tərəfindən verilən göndəriş vərəqəsi ödənişsizdir. Sığortaolunandan xidmət üçün ödəniş tələb olunarsa, bu barədə ilk növbədə tibb müəssisəsinin rəhbərliyinə müraciət etmək lazımdır.
Hər hansı bir şikayət olarsa, Agentliyin 1542 Çağrı Mərkəzinə zəng etmək və ya linkə daxil olaraq elektron şəkildə müraciət etmək olar.
Azərbaycanda icbari tibbi sığorta haqlarının toplanılmasına 1 yanvar 2021-ci il tarixindən başlanılıb.
