Son günlər sosial şəbəkələrdə Bakıda taksi sürücülərinin qadın sərnişinlərinə müxtəlif məzmunlu, eləcə də əxlaqsız təkliflər etdikləri əks olunan görüntülər paylaşılır. Bunu dekabrın 4-də Daxili İşlər Nazirliyinin (DİN) rəsmisi Ehsan Zahidov deyib.
O bildirib ki, bununla bağlı çoxsaylı şikayətlər daxil olur: “Görüntülər ictimailəşdikdən sonra DİN-in "102 Zəng Mərkəzi”nə və rəsmi səhifələrinə, polis orqanlarına qadınlar tərəfindən şikayətlər gəlir”. Qurumun rəsmisinin sözlərinə əsasən, müraciətlərin nəticələri barədə ictimaiyyətə əlavə məlumat veriləcək.
Qeyd edək ki, dekabrın 3-də sosial şəbəkələrdə xanım sərnişinin taksidə qısnamaya məruz qalmasını əks etdirən görüntülər paylaşılıb. Belə ki, taksi sürücüsü sərnişinə çay içmək təklifi edib. Qadının rədd cavabına baxmayaraq, sürücü təkliflərini davam etdirib.
DİN-dən verilən məlumata görə, həmin şəxs polis tərəfindən saxlanılıb. Daha sonra isə internetdə taksi sürücüsünün üzr videosu yayılıb.
