Bakıda azyaşlı uşağın məktəbdən çıxarkən hədələnərək qaçırılması cəhdi ilə bağlı DİN noyabrın 25-də məlumat yayıb. Azyaşlının qaçırılma cəhdi ilə bağlı iddialar nəzarətə götürülüb.
Bakının Sabunçu rayonunda azyaşlı qız məktəbdən çıxarkən naməlum şəxs onu bıçaqla hədələyərək zorla avtomobilə itələyib. Hadisə Mehdiabad qəsəbəsinin Umudvar Əliyev küçəsində qeydə alınıb.
Məktəblinin babası bildirib ki, ötən gün 18:00 radələrində nəvəsi 188 saylı tam orta məktəbdən çıxıb qardaşını axtararkən naməlum şəxs onu zorla avtomobilə mindirərək ərazidən uzaqlaşıb. Lakin bir neçə yüz metr getdikdən sonra uşaq yolda sinif yoldaşının valideyni ilə birlikdə evə getdiyini görüb. Uşaq dərhal maşından düşərək həmin valideynin yanına qaçıb. Avtomobili idarə edən naməlum şəxs ərazidən uzaqlaşıb.
Araşdırmanın nəticəsi ilə bağlı məlumat veriləcək. Qeyd edək ki, məktəbin ön kamerası işləmir. Lakin küçədə olan müşahidə kameralarından aydın olub ki, məktəblini ağ rəngli “Mitsubishi” markalı nəqliyyat vasitəsini idarə edən sürücü qaçırıb.
