Bəzi piyadalar onlar üçün nəzərdə tutulmuş piyada zolaqlarından və keçidlərdən istifadə etmirlər. Nəticədə piyada vurma hadisələrinin çoxu piyada keçidlərindən kənarda qeydə alınır. Bu Daxili İşlər Nazirliyindən noyabrın 24-də piyadalara və sürücülərə edilən müraciətdə deyilir.
Cari ilin 10 ayı ərzində respublika ərazisində baş vermiş yol-nəqliyyat qəzalarının 42%-i, Bakı şəhəri üzrə isə 57%-i piyadaların vurulması təşkil edir. Araşdırmalara əsasən, bu qəzalarda sürücülərlə yanaşı piyadaların da təqsiri olur.
Bununla bağlı Nazirlik piyadalara səslənib:
- küçə və yollarda piyadalar üçün nəzərdə tutulan yerlərdən keçin;
- məhdudiyyətli görünmə, duman, yağış, qar şəraitində və sutkanın qaranlıq vaxtı xüsusilə diqqətli olun;
- yaxınlaşmaqda olan avtomobillərin sürətini düzgün qiymətləndirin, sürücülərin sizə yol verdiklərinə əmin olduqdan sonra hərəkətə başlayın;
- yolu keçərkən mobil telefondan, eləcə də ətrafdakı avtomobillərin səsini vaxtında eşitmək üçün qulaqlıqdan istifadə etməyin.
“Eyni zamanda sürücülər yola çıxmış piyadaya yol verməli, piyadaların yola çıxma ehtimalı olan ərazilərdə diqqətli olmalı, təhlükəli situasiyanı düzgün qiymətləndirməyi bacarmalıdırlar”, - deyə Nazirlikdən əlavə edilib.
