Noyabrın 5-dən dekabrın 1-dək Amnistiya Aktı ilə 1391 məhkum azadlığa buraxılıb. Bunu jurnalistlərə açıqlamasında Ədliyyə Nazirliyinin rəsmisi Aynur Sabitova bildirib.
Onun sözlərinə əsasən, ümumilikdə Amnistiya 1787 nəfərə tətbiq edilib: “Onlardan 34 nəfəri qadın, 2 nəfəri yetkinlik yaşına çatmayan, 60 nəfəri isə 60 yaşlı olanlardır”.
Məhkumlardan 1023 nəfər cəzaçəkmə müəssisələrindən, 368 nəfər məntəqə tipli cəzaçəkmə müəssisəsindən evlərinə yola salınıb. 359 nəfər məhkum isə müalicəyə yönləndirilib, onlar sağalandan sonra azadlığa buraxılacaq. Cəzaları 6 ay azaldılanların sayı 64 nəfər təşkil edib.
Amnistiya Aktının ümumilikdə 17 min nəfərə şamil olunması gözlənilir. Milli Məclis Amnistiya elan edilməsi haqqında qanun lahiyəsini noyabrın 5-də təsdiqləyib. Amnistiya Aktının icra müddəti 4 ay göstərilməsinə baxmayaraq daha qısa müddətdə yekunlaşması nəzərdə tutulub.
