Dekabrın 30-da Baş Dövlət Yol Polisi İdarəsi bayramla əlaqədar yol hərəkəti iştirakçılarına müraciət edərək yollarda təhlükəsizlik qaydalarına riayət etməyə çağırıb.
Məlumata əsasən, bayramla əlaqədar qeyri-iş günlərində nəqliyyatın hərəkət intensivliyi yüksəlir. Şəhər sakinləri bölgələrdəki istirahət zonalarına, rayon əhalisi isə Bakıya səfər edir. Nəticədə bəzi sürücülərin tələskənliyi, sürət həddini aşmaları, araməsafəsi, ötmə və manevr etmə qaydalarını pozmaları müşahidə edilir. Bu isə yol qəzalarının yaranmasına səbəb ola bilər.
DYP sürücülərə yol hərəkəti qaydalarını pozmamağı, uzaq məsafələrə günün işıqlı vaxtında yola düşməyi, fasiləsiz uzun müddət avtomobil sürməməyi və səfərə çıxmazdan əvvəl nəqliyyat vasitəsinin texniki sazlığını yoxlamağı tövsiyə edib. Həmçinin sürücüdən təhlükəsizlik kəmərini özü ilə yanaşı sərnişinlərin də bağlamasını təmin etməsi, yuxusuz və sərxoş vəziyyətdə sükan arxasına əyləşməməsi istənilib.
Bununla yanaşı, piyadalara səkilərlə hərəkət etmək və avtomobil yollarına çıxmamaq tövsiyə edilib.
