Nasaz avtomobillə törədilən qəza sürücünü hər bir halda haqsız vəziyyətə sala və cinayət məsuliyyətinə cəlb etdirə bilər. Bu barədə noyabrın 30-da Bakı şəhər Dövlət Yol Polisi İdarəsinin baş inspektoru Araz Əsgərli məlumat verib.
Məlumata əsasən, avtomobilin vaxtında aradan qaldırılmayan texniki problemlərinə görə sürücü məsuliyyət daşıyır.
“Məsələn, sürücü baş verə biləcək hadisənin qarşısını almaq üçün bütün zəruri addımları atıb, lakin hadisənin qarşısını əyləc sistemindəki nasazlıq ucbatından ala bilməyib. Səbəb kimi isə avtomobilində texniki nasazlığın olması barədə avto-texniki ekspertizanın rəyini təqdim edib. Bu zaman sürücünün məsuliyyətsizliyi isə artıq “Yol hərəkəti haqqında" qanununa əsasən nasazlıqların siyahısı üzrə müəyyən edilir”, - deyə baş inspektor vurğulayıb.
Həmçinin Araz Əsgərli qış fəslinin texniki tələblərini nəzərə alaraq avtomobilə gündəlik texniki qulluğu diqqətdən kənar saxlamamağı tövsiyə edib.
