Sürücülərin yuxulu və yorğun halda sükan arxasında əyləşməsi ağır yol nəqliyyat hadisələrinin baş vermə səbəblərindən biridir. Bunu dekabrın 15-də Baş Dövlət Yol Polisi İdarəsinin şöbə rəisi Namidan Piriyev deyib.
Yol polisi sürücülərə müraciət edərək bildirib ki, bədbəxt hadisələrdən qorunmaq üçün iş və istirahət rejiminə düzgün riayət etmək, 2-3 saatdan bir fasilə etmək lazımdır.
Son 2 ay ərzində respublika əhəmiyyətli avtomobil yollarında sürücülərin sükan arxasında yuxulaması səbəbindən 9 ağır yol-nəqliyyat hadisəsi baş verib.
Cari ilin iyulun 9-da Bakı-Qazax yolunda avtomobil sürücüsü sükan arxasında yatıb və eyni istiqamətdə hərəkətdə olan digər avtomobilin arxa hissəsinə çırpılıb. Nəticədə 5 nəfər hadisə yerində ölüb, 2 nəfər yaralanıb.
Eyni səbəbdən oktyabr ayının 13-də Bakı şəhəri Aeroport şosesində “Mercedes-Benz” markalı yük avtomobili qarşıda gedən sərnişin avtobusuna çırpılıb. Nəticədə 6 nəfər həlak olub, 25 nəfər isə xəsarət alıb.
