Ermənistan Baş naziri Nikol Paşinyanın Fransa, Almaniya, İran liderləri və ABŞ dövlət katibi ilə telefon danışıqları olub. Bu barədə 9 sentyabr tarixində APA xəbər yayıb.
Fransa Prezidenti Emmanuel Makron Ermənistan baş naziri Nikol Paşinyana zəng edib. O, Paşinyanla Ermənistan və Azərbaycan sərhədində artan gərginliyi müzakirə edib, bütün fikir ayrılıqlarını diplomatik yolla həll etməyə çağırıb.
Makron məsələnin beynəlxalq hüquq normalarına uyğun ədalətli həllinə sadiqliyini qeyd edib.
Daha sonra Ermənistan Baş naziri Nikol Paşinyan və Almaniya Kansleri Olaf Şolts arasında telefon danışığı olub.
Tərəflər Qarabağda vəziyyəti və Ermənistan-Azərbaycan sərhədindəki gərginliyi müzakirə ediblər. Ermənistan Baş naziri Paşinyan 6 oktyabr 2022-ci ildə Praqada və 2023-cü il mayın 14-də Brüsseldə əldə edilmiş razılaşmalar əsasında bütün məsələlərin müstəsna olaraq diplomatik vasitələrlə və konstruktiv atmosferdə həllinə dair yanaşmalara sadiqliyini təsdiqləyib. Nikol Paşinyan vurğulayıb ki, Azərbaycan Prezidenti ilə gərginliyin azaldılması istiqamətində təcili müzakirələr aparmağa hazırdır.
Kansler Şolts regionda sülh və sabitliyin bərqərar olmasına yönəlmiş səyləri dəstəkləməyə hazır olduğunu qeyd edib.
Ermənistan Baş naziri daha sonra İran Prezidenti İbrahim Rəisiyə zəng vurub.
Onlar Qarabağdakı vəziyyəti müzakirə ediblər.
Nikol Paşinyanın növbəti telefon danışığı ABŞ dövlət katibi Entoni Blinkenlə olub.
Paşinyan və Blinken telefon danışığında Qarabağdakı və Ermənistan-Azərbaycan sərhədindəki vəziyyəti müzakirə ediblər.
