Füzuli və Beyləqan rayonlarında payızlıq əkinlərin bəyan edilməsi barədə maarifləndirmə işləri aparılıb. Bu haqda 6 dekabr tarixində Kənd Təsərrüfatı Nazirliyi məlumat verib.
Görüşlərdə bildirilib ki, fermerlər öz əkinlərini bəyan etməli və ildə bir dəfə EKTİS-də şəxsi kabinetlərini aktivləşdirməlidirlər. Daha sonra torpaq üzərində mülkiyyət hüququnu təsdiqləyən sənədlər və əkin məlumatları sistemə daxil edilməlidir. Bundan sonra fermerin subsidiya almaq üçün elektron müraciəti formalaşır. Bəyan üçün son tarix 30 dekabrdır. Subsidiya ödənişi isə fevral-mart aylarına planlaşdırılıb.
Həmçinin keçirilən tədbirdə sahibkarlara məlumat verilib ki, əkin sahəsi 5 hektardan yuxarı olduqda torpağın aqrokimyəvi analizi verilməlidir, 10 hektardan yuxarı sahələr isə sığorta olunmalıdır. Bundan əlavə, nəzərə çatdırılıb ki, fermerlər həm arpa, həm buğda əkininə görə hər hektara 210 manat subsidiya alacaqlar.
Hazırda fermerlərə bəyan prosesində köməklik göstərmək üçün Füzuli rayonunda 6 səyyar qrup xidmət göstərir.
2020-2021-ci illərin payızlıq əkinləri dövründə Füzuli və Beyləqan rayonlarında ümumilikdə 50 min hektara yaxın sahədə arpa və buğda əkilib. Sözügedən rayonlarda 11 000 nəfərdən çox fermerə əkin subsidiyası ödənilib.
