Payızlıq əkinlərin Elektron Kənd Təsərrüfatı İnformasiya Sistemində (EKTİS) bəyan edilməsi ilə əlaqədar Şamaxı və İsmayıllı rayonlarında görüşlər keçirilib. Bu haqda 25 noyabr tarixində Kənd Təsərrüfatı Nazirliyinin saytında məlumat verilib.
Tədbir çərçivəsində fermerlər məlumatlandırılıblar ki, payızlıq əkinlərinin dövlət tərəfindən subsidiyalaşdırılması üçün fermerlər hansı məhsulu əkdiyini EKTİS-də vaxtında bəyan etməlidirlər.
Həmçinin görüş zamanı qeyd edilib ki, payızlıq əkinlərin bəyanına sentyabrın 1-dən start verilib və bu proses dekabrın sonunadək davam edəcək. Sahibkarlar öz əkin məlumatlarını EKTİS-də nə qədər tez bəyan etsə, ilin əvvəlində bir o qədər tez əkin subsidiyası almaq imkanı qazanır.
Şamaxı və İsmayıllı rayonlarında hər il 70 min hektardan artıq sahədə payızlıq əkin aparılır. Taxıl əkininə görə bu rayonlarda təxminən 10 min fermerə əkin subsidiyası ödənilir.
Mövzu ilə bağlı növbəti görüşlərin Göyçay, Ağdaş və Ağsu rayonlarında keçirilməsi nəzərdə tutulur.
Fermerlər eagro.az saytı vasitəsilə onlayn şəkildə və ya Dövlət Aqrar İnkişaf Mərkəzlərinə, Regional ASAN xidmət mərkəzlərinə, Xaçmaz və Yevlax KOB evlərinə müracət edib payızlıq əkinlərini bəyan edə bilərlər.
