2022-ci ildən bitki xəstəliklərinin qarşısını almaq üçün “Rəqəmsal Kənd Təsərrüfatı” layihəsi Cəlilabad və Zaqatalada da keçiriləcək. Bu haqda 27 dekabrda Kənd Təsərrüfatı Nazirliyinin saytında məlumat verilib.
Sözügedən layihəyənin həyata keçirilməsinə 2021-ci ilin birinci rübündə başlanılıb. Pilot layihə Quba və Qusarda alma, gilas, şaftalı və nektarin təsərrüfatları ilə məşğul olan 5800-dən artıq fermeri əhatə edib.
Belə ki, stansiyalar üzərində quraşdırılmış sensorlar havanın temperaturu, rütubət səviyyəsi, yağış miqdarı, yarpaqların nəm qalma müddəti, yağıntıların düşmə vaxtı və küləyin sürəti barədə məlumatları toplayır. Daha sonra bu məlumatlar Nazirliyin əməkdaşları tərəfindən analiz edilir. Zərərvericilərin yayılması üçün uyğun şərait qeydə alındıqda, fermerlərə bununla bağlı SMS bildirişlər göndərilir. Cari il ərzində fermerlərə ümumilikdə 20 mindən çox SMS bildirişləri göndərilib.
Bununla yanaşı, fermerlərə köməklik məqsədi ilə “Rəqəmsal Kənd Təsərrüfatı” adlı “Telegram” kanalı yaradılıb.
