Göyçayda bacısı qızını qətlə yetirən şəxsə dekabrın 9-da cəza verilib. Hökmə əsasən, Vüqar Bədəlov 14 il 6 ay azadlıqdan məhrum edilib.
Hadisə bu ilin may ayında baş verib. Dayı bacısı qızının “Tiktok”da yayılan videolarını görüb və buna görə aralarında söz-söhbət baş verib. Nəticədə o, mərhumu öldürüb.
Qızın anası övladının meyitini görərək komaya düşüb. Vüqar Bədəlov törətdiyi əməlini ört-basdır etmək üçün evə çağırdığı təcili tibbi yardım stansiyasının həkimlərinə onların dəm qazından zəhərləndiyini deyib. Araşdırma zamanı qızın boğularaq öldürüldüyü müəyyən edilib.
Azərbaycanda 2021-ci ilin 9 ayı ərzində baş verən qəsdən adam öldürmə və adam öldürməyə cəhd cinayətləri nəticəsində 51 qadın həyatını itirib. Vətəndaşlar qadına qarşı zorakılıq halları ilə üzləşdikdə Baş Prokurorluğun “961” Çağrı Mərkəzinə müraciət edə bilərlər.
