Son günlər sosial şəbəkələrdə lazer üsulu ilə epilyasiya proseduru həyata keçirən müəssisələrdə yoxlamalar aparılması ilə bağlı məlumat yayılır. Yoxlama zamanı bildirilib ki, artıq epilyasiya proseduru tibbi kosmetologiyaya aid olduğu üçün icrası yalnız tibb müəssisələrində mümkündür.
Məsələ ilə bağlı Bakuplus.az Analitik Ekspertiza Mərkəzinə sorğu ünvanlayıb.
Qurumdan bildirilib ki, lazer üsulu ilə epilyasiya proseduru tibbi kosmetologiyaya aiddir və icrası tibb müəssisələrində tibb təhsili olan mütəxəssislər (ixtisaslı həkim dermatoloqun nəzarəti altında dövlət sertifikasiya şəhadətnaməsinə malik tibb bacısı və ya tibb qardaşı) tərəfindən həyata keçirilməlidir:
“Bərbər və vizajist xidmətlərinin göstərilməsi üçün nəzərdə tutulan sahibkarlıq subyektlərinin fəaliyyətinə nəzarət isə Səhiyyə Nazirliyinin səlahiyyətlərinə aid deyil.
Gözəllik salonlarına gəldikdə isə, Azərbaycan Respublikası Səhiyyə Nazirliyinin 07 aprel 2009-cu il tarixli 37 nömrəli əmri ilə təsdiq edilən “Tibb müəssisələrində sanitariya-epidemioloji tələblərə dair qaydalar”a cavab vermədiyindən həmin müəssisələrdə tibbi kosmetoloji prosedurların həyata keçirilməsi birmənalı şəkildə yolverilməzdir.
Gözəllik salonlarında tibbi kosmetoloji prosedurların keçirilməsi ilə bağlı Səhiyyə Nazirliyinə vətəndaş və yerli dövlət özünüidarəetmə orqanlarından fakta əsaslanan müraciətlər daxil olduqda Analitik Ekspertiza Mərkəzi tərəfindən plandankənar yoxlamalar keçirilir ki, həmin xidməti yoxlamalar zamanı fakt öz təsdiqini tapdığı halda sahibkarlıq subyektlərinə inzibati qaydada tənbeh tədbiri seçilərək barələrində inzibati xətalar məcəlləsinin müvafiq maddələri ilə inzibati xəta haqqında protokol tərtib edilir.
Odur ki, gözəllik salonlarında mövcud tibbi kosmetoloji prosedurların həyata keçirilməsinin sahibkarlıq subyektləri tərəfindən dayandırılması zəruridir. Əks halda onlar inzibati məsuliyyətə cəlb oluna bilərlər.
Özəl tibb müəssisələrində və aptek təşkilatlarında baş verən qanun pozuntularına rast gəldikdə vətəndaşlar AEM-in “bir pəncərə” sistemi, “qaynar xətt”i (012 596 07 12), [email protected] elektron ünvanı və ya pharma.az saytının MÜRACİƏT bölməsi vasitəsi ilə bizə müraciət edə bilər. Bu halda araşdırılma aparılır və lazım gələrsə, plandankənar yoxlama aparılması barədə qərar qəbul edilir”.
Fidan İlqar
