Hədə-qorxu gələrək vətəndaşların pulunu ələ keçirən “Ltv 7” internet kanalının əməkdaşları barəsində cinayət işi məhkəməyə göndərilib. Bu barədə Baş Prokurorluq dekabrın 14-də məlumat verib.
Məlumata əsasən, 2021-ci ilin fevralın 13-də xəbər kanalının bölgə müxbiri Fazil Quliyev və bloger Vüsal Zeynalov özlərini jurnalist kimi təqdim edərək DSX-nın hərbi hissəsini mobil telefonlarına çəkiblər. Daha sonra onlar hərbi hissənin təsərrüfat fəaliyyətinə dair videoları sosial şəbəkələrdə yayacaqları hədəsi ilə hərbi hissənin rəhbərliyindən 500 manat pul tələb ediblər.
Bununla yanaşı, “Ltv 7” internet kanalının direktoru, direktor müavini, müxbiri, operatoru və sürücüsü qabaqcadan əlbir olub özlərini jurnalist kimi təqdim edərək pandemiya ilə bağlı karantin qaydalarını pozmuş şəxslərdən onları rüsvay etməmək müqabilində pul alıblar.
Sözügedən şəxslər barəsində “qabaqcadan əlbir olan bir qrup şəxs tərəfindən hədə-qorxu ilə tələb etmə” və digər maddələrə əsasən həbs və polisin nəzarəti altına vermə qətimkan tədbirləri seçilib.
Hazırda cinayət işi Sumqayıt Ağır Cinayətlər Məhkəməsinə göndərilib.
