Həyat yoldaşı Sevinc Məhərrəmovanı qətlə yetirmiş 42 yaşlı Füzuli Qarayevin məhkəməsi başlayır. Bu barədə dekabrın 15-də Report məlumat verib.
Avqustun 3-də 24 yaşlı Sevinc Məhərrəmova əri tərəfindən paytaxtın Zirə qəsəbəsində döyülüb və çoxsaylı bıçaq zərbələri nəticəsində öldürülüb.
Məlumata əsasən, Sevinc həyat yoldaşı ilə aralarında yaranan mübahisədən sonra onun zənglərinə cavab verməyərək qonşusu Röyal Hüseynovun evinə sığınıb. Lakin əri ora gələrək Röyal Hüseynovun yanında fəhlə işləyən Ramil Bəşirovu bıçaqlayıb, daha sonra isə çoxsaylı bıçaq zərbələri yetirərək Sevinci öldürüb.
Mart ayında Sevinc qadın hüquqları fəalları ilə əlaqə yaradıb. Sosial şəbəkələrdə onun döyülmə izləri ilə şəkilləri yayılıb. Qadın rəsmi qurumlara da müraciət edib, lakin onlar Sevinci yoldaşı ilə barışdırmağa çalışıb.
Füzuli Qarayev “qəsdən adam öldürmə” maddəsi ilə ittiham olunub.
Cinayət işi Bakı Ağır Cinayətlər Məhkəməsinə göndərilib.
Azərbaycanda 2021-ci ilin 9 ayı ərzində baş verən qəsdən adam öldürmə və adam öldürməyə cəhd cinayətləri nəticəsində 51 qadın həyatını itirib.
