Həzi Aslanov metrostansiyası 12 dekabr 2002-ci ildə istismara verilmişdir. Tikintisi Avropa Birliyi tərəfindən maliyyələşdirilmişdir.
Qırmızı xəttin bu günə qədər istifadəyə verilmiş sonuncu stansiyasıdır. Stansiya Azərbaycan xalqının şanlı oğlu, iki dəfə Sovet İttifaqı qəhrəmanı Həzi Aslanovun adını daşıyır.
Stansiyanın inşaatı 1980-ci illərdə başlanmış, lakin 1990-cı illərin böhranlı vaxtlarında dondurulmuşdur və daha sonra Avropa Birliyinin ayırdığı 4,5 milyon avrodan sonra tikinti başa çatmışdır. Tikintinin qalan məbləğini isə Azərbaycan dövləti öz üzərinə götürərək, inşaat işlərinə 5,5 milyon manat ayırmışdır.
Burada pilləkən üstü tavan divarında stansiyanın inşasının Avropa Birliyinin maliyyə dəstəyi ilə tamamlanmasını əks etdirən yazı və təşkilatın bayrağı yerləşdirilib.
Stansiyaya daxil olan qatarlarda bəstəkar Qəmbər Hüseynlinin «Ay işığında» mahnısından fraqment səslənir.
