İnsanoid Azərbaycanın ən qədim şəhərlərindən olan Şəkiyə səyahət edib və şəhərin gəzməli-görməli yerləri haqda fotoreportaj hazırlayıb.
Şəhərə gələn hər bir turistin ilk növbədə getdiyi yer “Xan Sarayı”dır. İnşa tarixi 1762-ci ilə təsadüf edən dünya əhəmiyyətli bu abidənin həyətinə giriş ödənişsizdir. Sarayın içinə ekskursiya isə ödənişlidir: yerli vətəndaşlar üçün 2 manat, xarici qonaqlar üçün 5 manat, tələbələr üçün 1 manat. 18 yaşına qədər olan uşaqlar, Milli Qəhrəmanlar, I və II qrup əlillər, müharibə veteranları üçün giriş sərbəstdir.
[gallery link="file" size="full" ids="50433,50803,50435"]
Şəkinin zəngin maddi və mənəvi irsini özündə birləşdirən digər məkan “Yuxarı Karvansaray”dır. 18-ci əsrə aid bu tarixi abidə həm də hotel və restoran kimi də fəaliyyət göstərir.
[gallery link="file" columns="2" size="full" ids="50436,50437,50438,50439"]
Turistlərin marağına səbəb olan digər yer isə “ABAD” Keramika və Tətbiqi Sənət Mərkəzidir. Tikintisi 19-cu əsrə aid bina əvvəllər kazarma kimi istifadə olunub. 2018-ci ildən etibarən isə burada rəssam-keramistlərin və digər yaradıcı insanların əl işləri nümayiş edilir və onların satışı təşkil olunur.
[gallery link="file" size="full" ids="50440,50441,50442,50443,50444,50445"]
Eyni zamanda, buraya gələn hər bir kəs Şəki Sənətkarlar Evini də ziyarət edə bilər. Buradan rəngarəng əl işləri əldə etmək olar.
[gallery link="file" size="full" ids="50446,50448,50449"]
Digər maraqlı tarixi məkan “Dairəvi məbəd” ola bilər. Bura da ölkə əhəmiyyətli memarlıq abidəsi sayılır. Hazırda bu tikilinin içində Şəki Xalq Tətbiqi Sənət Muzeyi yerləşir. Muzey hər gün fasiləsiz olaraq saat 09:00-dan 18:00-dək işləyir.
[gallery link="file" columns="1" size="full" ids="50452"]
Təbii ki, Şəkini ziyarət edib şirniyyatsız geri qayıtmaq mümkün deyil. Şəhərdə bir çox şirniyyat dükanları var və onlardan biri “Halvaçı Yəhya”dır. Burada halva, bamiyə, mindal, nuqa, tel halva kimi müxtəlif məhsullar almaq mümkündür. Fındıqlı Şəki halvasının bir kiloqramının qiyməti 9, qozla olanının isə 12 manatdır. Uzun, sadə bamiyələrin yarım kilosu 2,5, xırda, südlülərin isə 3,5 manatdır.
[gallery link="file" size="full" ids="50453,50455,50456"]
Şəki şəhəri paytaxtdan şimal-qərb istiqamətində 244 kilometr məsafədə yerləşir. Avtomobillə şəhərə təxminən 4 saata çatmaq olar.
