İmişlinin sabiq icra başçısı Vilyam Hacıyevin cinayət işi üzrə məhkəmə prosesi davam etdirilib. Bu barədə mayın 27-də APA məlumat yayıb.
Məhkəmədə Vilyam Hacıyev rüşvət alma epizodu üzrə danışıb: “İcra başçısı işləyən vaxt mənə təqdim olunan bütün sənədlər qanuni formada olurdu, digər işçilər nə isə pozuntular ediblərsə, mənim xəbərim olmayıb. Mən heç kimdən rüşvət almamışam, heç kim də mənə rüşvət verməyib”.
Report-dan verilən məlumata görə, o, barəsində irəli sürülən ittihamların əsassız olduğunu, evində və iş otağında aşkarlanan 6 milyon manatdan çox vəsaitin həyat yoldaşının babasından miras qaldığını söyləyib. Qanunsuz silahla bağlı sabiq icra başçısı qeyd edib ki, həmin silahı illər öncə rəsmi sənədlə alıb.
Vilyam Hacıyev ona miras kimi qalan 6 milyon manat pulu dövlət nəfinə ödəməyə hazır olduğunu deyib: “Verilmiş maddələrlə bağlı özümü təqsirli bilməsəm də, qanunsuzluqlar mənim işlədiyim dövrdə olub”.
Məhkəmə prosesi iyunun 3-də davam etdiriləcək.
Vilyam Hacıyev 2020-ci ilin mayında Dövlət Təhlükəsizliyi Xidməti (DTX) tərəfindən saxlanılıb. Sabiq icra başçısı “mənimsəmə və ya israf etmə”, “vəzifə səlahiyyətlərindən sui-istifadə”, “rüşvət alma” və digər maddələrlə ittiham olunub.
Bundan öncə, sabiq başçı 124 manata kirayə evdə qaldığını bildirib. Vilyam Hacıyevin üzərinə həbs qoyulmuş əmlaklarının siyahısı ilə buradan tanış olmaq olar.
