Avqustun 9-da Ekologiya və Təbii Sərvətlər Nazirliyinin verdiyi məlumata görə, Sumqayıt, Gəncə və Qubada havanı çirkləndirən müəssisələr cəzalandırılıb.
Sumqayıtda aparılan monitorinqlər zamanı “AzMet” QSC-nin qaz-toz tutucu qurğusunda təmizləyici filtrlərin işləmədiyi, havaya normadan artıq tüstünün atıldığı məlum olub. Müəssisənin direktoru vəzifəli şəxs qismində 3000 manat məbləğində cərimələnib.
Monitorinqlər zamanı Gəncədə məişət tullantıları poliqonunda tullantıların istidən öz-özünə alışdığı və nəticədə havaya normadan artıq tüstünün atıldığı məlum olub. Belə halların təkrarlanmaması üçün poliqon rəhbərliyinə məcburi göstəriş verilib.
Quba rayonunda isə Dəvədabanı yaşayış massivində məişət tullantılarının yandırıldığı, nəticədə ətrafa tüstü və qoxunun yayıldığı aşkarlanıb. Faktla bağlı protokol tərtib edilib.
Avqustun 5-də keçirilən monitorinqlər zamanı Sumqayıtda fəaliyyət göstərən “Baku Non Ferrous and Foundry Company” MMC və yağ zavodundan atmosferə normadan artıq hidrogen-sulfidin atıldığı müəyyən edilib. Faktla bağlı hər iki müəssisə barəsində akt və protokol tərtib olunub.
