Azərbaycan Ermənistan ilə sülh danışıqlarının başlanmasında və regionda dayanıqlı sülhün təmin edilməsində maraqlıdır. Bunu dekabrın 2-də Prezidentin köməkçisi Hikmət Hacıyev “Mədəniyyət naminə sülh” forumunda çıxışı zamanı deyib.
O, işğal edilmiş ərazilərdə Azərbaycanın mədəni abidələrinin sistemli şəkildə məhv edildiyini bildirib. Hikmət Hacıyev beynəlxalq ictimaiyyəti buna diqqət yetirməyə və işğaldan azad edilmiş ərazilərə qiymətləndirmə missiyası ilə səfər etməyə çağırıb.
“Mina problemi hələ də qalmaqdadır. Azad olunan ərazilərdə mülki şəxslərlə yanaşı, işçilər, hərbçilər də minaya düşür”, - deyə Hikmət Hacıyev vurğulayıb. Onun sözlərinə görə, bu məsələdə Ermənistanın əsas məqsədi Azərbaycanın işğaldan azad edilmiş ərazilərində quruculuq və məcburi köçkünlərin qayıdışı prosesinə mane olmaqdır.
Eyni zamanda Prezidentin köməkçisi Azərbaycanın media nümayəndələrinə müraciət edib: “Ermənistan mediasına istinadları minimuma endirək. Çünki kifayət qədər saxta, yalan məlumatlar yayılır”.
