Ağdam, Sabirabad və Saatlı rayonlarındakı xəstəxanalar Xankəndidən xeyli sayda xəstənin qəbul edilməsi üçün hazırdır.
Bu barədə Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev 26 sentyabr tarixində “X” platformasındakı paylaşımında qeyd edib.
“Biz yerdəki humanitar ehtiyacların ödənilməsi üçün Beynəlxalq Qızıl Xaç Komitəsi (BQXK) ilə, həmçinin Qarabağın erməni sakinlərinin nümayəndələri ilə müntəzəm əlaqədəyik”, - Prezidentin köməkçisi qeyd edib.
Hikmət Hacıyev bildirib ki, Ağdam, Sabirabad və Saatlı rayonlarındakı xəstəxanalar Xankəndidən xeyli sayda xəstənin qəbul edilməsi üçün əlavə tibbi heyətlə gücləndirilib.
“ - Xüsusilə yanıqların müalicəsi üçün dərmanlar və digər tibbi ləvazimatlar göndərilib. Bundan əlavə, ərzaq yardımı da çatdırılıb. Yardım bu gün də, yaxın günlərdə də davam edəcək.
- Ermənistandan Qarabağa tibbi yardıma ehtiyacı olan insanların daşınması və yerində tibbi yardımın göstərilməsi üçün həkim briqadası olan helikopterin çıxışı təmin edilib.
- Hazırda biz BQXK-ya tibbi evakuasiya və humanitar yardımın çatdırılması üçün Gorus-Qafan-Eyvazlı-Füzuli-Şuşa-Xankəndi yolu ilə eksklüziv çıxışın təmin edilməsi üzərində işləyirik”, - paylaşımda qeyd edilib.
