Onların sayı paytaxtın mərkəzi küçələrində, şəhərətrafı qəsəbələrdə, parklarda, hətta məktəb və dayanacaqların qarşısında günü-gündən artmaqdadır. Bəli, söhbət sahibsiz itlərdən gedir. Artıq küçə itləri potensial təhlükəyə çevrilib. Ölkənin hər yerində aktual olan problemə yerli icra hakimiyyətləri də əncam çəkməkdə maraqlı görünmür. Digər ölkələrdə olduğu kimi Bakını bürüyən sahibsiz itlər nə küçələrdən yığışdırılaraq sığınacaqlara yerləşdirilir, nə qısırlaşdırılır, nə də quduzluğa qarşı mübarizə tədbirləri aparılır.
Belə ərazilərdən biri də Suraxanı rayonu, Hövsan qəsəbəsidir. Qəsəbənin demək olar ki, hər tərəfini, xüsusilə bağlar massivini küçə itləri bürüyüb. Məktəb həyətləri, binaların qarşısı, zibil yeşiklərinin yanı, eləcə də boş və kənar ərazilərdə sahibsiz itlər sürü ilə gəzir. Bu təhlükə nəinki azyaşlıların, elə böyüklərin də kabusuna çevrilib. Məsələnin ən təhlükəli tərəfi ac-susuz, qayğısız qalan küçə itlərinin daha aqressiv və təhlükəli olmasıdır.
Bu günlərdə qəsəbənin Yeddi gözəl parkı ərazisinə yaxın dayanacağın ətrafında küçə itlərinin sürü ilə insanlara hücum etməsi məsələni bir daha aktuallaşdırıb. Redaksiyamıza müraciət edən sakinlərin sözlərinə görə küçə itləri ilə bağlı hər gün eyni vəziyyət yaşanır. Dayanacaqda itlərin əlindən rahat hərəkət etmək və avtobusa minmək olmur. Əldə hər hansı yük olanda isə itlər sürü ilə arxalarınca düşür.
Digər sakinlər isə azyaşlı övladlarına görə narahat olduqlarını bildiriblər. Dediklərinə görə uşaqlarını tək məktəbə göndərə bilmirlər. Dəfələrlə itlər onların üstünə hücum edib və yaxınlıqdak insanların köməyi ilə təhlükədən qoruna biliblər. Eyni zamanda bildiriblər ki, əvvəl qəsəbədə tək-tük küçə iti görünürdüsə, indi addımbaşı onlara rast gəlmək mümkündür.
Məsələ ciddi narahatlıq doğurduğu üçün müvafiq qurumlara müraciət etdik.
Suraxanı rayon İcra Hakimiyyətindən Bizim.Media-nın sorğusuna cavab olaraq bildirildi ki, məsələ ilə bağlı tədbirlər görülməkdədir:
“Sakinlərin Toplan Sahibsiz İtlərə Qayğı Mərkəzinin “1921” qaynar xəttinə müraciətləri əsasında Mərkəz tərəfindən bu istiqamətdə rayonda profilaktik işlər aparılır. Lakin buna baxmayaraq rayonun inzibati ərazisində sahibsiz heyvanların sayının artması səbəbindən, eyni zamanda, sakinlər tərəfindən ünvanlanan müraciətləri nəzərə alaraq RİH tərəfindən bu problem nəzarətdə saxlanılaraq aidiyyəti üzrə Bakı Şəhər İcra Hakimiyyəti Mənzil-Kommunal Təsərrüfatı Departamentinin Sanitariya və Texniki Təmizlik İdarəsinə mütəmadi müraciətlər ünvanlanır”, - deyə qurumdan bildirilib.
Hövsan bələdiyyə sədri Seymur Rəsulovun isə cavabı qəribə olub. O, deyib ki, məsələ ilə bağlı bələdiyyəyə heç bir şikayət daxil olmayıb:
“Küçə itləridir, pişikləridir ümumiyyətlə bunlara toxunmaq olmaz. Ona görə də biz aidiyyəti qurumlara bildirməliyik və onlar da gəlib yoxlayıb tədbir görməlidir. Biz öz tərəfimizdən də lazimi tədbirlər görəcəyik, məsələyə laqeyid yanaşmayacağıq. İnsanların təhlükəsizliyi bizim üçün olduqca vacibdir”, - deyə bələdiyyə sədri bildirib.
