1941–1945-ci illərdə İkinci Dünya müharibəsində iştirak etmiş şəxslərə 1 500 manat məbləğində birdəfəlik maddi yardım veriləcək. Bu haqda aprelin 19-da Prezident İlham Əliyev Sərəncam imzalayıb.
Eyni zamanda, İkinci Dünya müharibəsində həlak olmuş və ya sonralar vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslərə, Leninqrad şəhərinin müdafiəsinə görə müvafiq medal və döş nişanı ilə təltif edilmiş şəxslərə 750 manat ödəniləcək.
Bu məqsədlə dövlət büdcəsindən 3,5 milyon manat vəsait ayrılıb.
Ümumilikdə Sərəncam 4500-ə yaxın şəxsi əhatə edəcək. Belə ki, 96 nəfərin hər birinə 1500 manat, 4 395 nəfərin hər birinə isə 750 manat veriləcək.
