İlkin Süleymanovun apellyasiya şikayəti təmin edilməyib. Bu barədə 31 iyul tarixində Report məlumat verib.
Tovuz rayonunun 10 yaşlı Dondar Quşçu kənd sakini Nərmin Quliyevanın qətlində ittiham olunan İlkin Süleymanovun apellyasiya şikayəti üzrə məhkəmə prosesi keçirilib.
Ötən məhkəmədə İlkin Süleymanov hakimdən son söz üçün vaxt istəmişdi.
Bu gün o, son söz deyərək, bir daha özünü təqsirli bilmədiyini söyləyib və Gəncə Ağır Cinayətlər Məhkəməsinin verdiyi qərarın dəyişdirilməsini istəyib.
Son sözdən sonra hakim qərar verib. Apellyasiya Məhkəməsi İlkin Süleymanovun şikayətini təmin etməyib.
Qeyd edək ki, Tovuz rayonunun Dondar Quşçu kənd sakini N.Quliyeva 2019-cu il noyabrın 21-də itkin düşüb. Onun meyiti 2020-ci il yanvarın 6-da yandırılmış halda tapılıb. 2020-ci il yanvarın 10-da isə hadisəni törətməkdə şübhəli bilinən 1973-cü il təvəllüdlü Dondar Quşçu kənd sakini İ.Süleymanov saxlanılaraq istintaqa cəlb edilib.
Ona “xüsusi amansızlıqla qəsdən adam öldürmə”, “təqsirkar şəxs üçün aşkar surətdə köməksiz vəziyyətdə olan adamı qəsdən öldürmə”, “adam oğurluğu” və başqa maddələrdə nəzərdə tutulan ittiham elan olunub. İlkin Süleymanov məhkəmənin qərarı ilə 18 il müddətinə azadlıqdan məhrum edilib.
