İmişlinin Çaxırlı kəndindəki mağazadan 650 manat pul və oradakı “MilliÖn” ödəmə terminalından 4 000 manat oğurlayan Qobustan rayon sakini saxlanılıb. Bu barədə mayın 4-də Report Daxili İşlər Nazirliyinə istinadən məlumat verib.
Saxlanılan Nahid Süleymanov əvvəllər də oğurluğa görə məhkum olunub. O, həmçinin Bərdə rayonunun Kələntərli kəndindəki mağazadan 150 manat pul, 200 manat dəyərində tütün məmulatı, videomüşahidə kamerasının yaddaş qurğusu və oradakı “E-Manat” ödəmə terminalından 1 611 manat pul oğurlayıb.
Bununla yanaşı, N.Süleymanovun Ağsuda mağazadan 100 manat pul, 2 700 manat dəyərində tütün məmulatı, noutbuk, oradakı terminaldan 2 418 manat pul, Muradlı kəndindəki digər mağazadan isə 80 manatlıq tütün məmulatı oğurladığı da məlum olub.
Faktla bağlı araşdırma davam edir.
