Bu ilin iyul ayı nələrlə yadda qalacaq? Bunu öyrənmək üçün İnsanoid keçirilməsi nəzərdə tutulan tədbirlərin bəziləri haqda araşdırma aparıb sizə təqdim edir:
Xalq artisti Miri Yusif 2020-ci ildə baş tutmalı olan və pandemiyaya görə təxirə salınan konsertini 1 - 3 iyulda Yaşıl Teatrda keçirəcək. Həmin vaxt alınan biletlər bu il keçərli olacaq. Biletlərin qiyməti 15 - 150 manatdır.
Rusiyada fəaliyyət göstərən Azərbaycan əsilli ifaçı Jony iyulun 2-də Sea Breeze Resort-da solo konsert verəcək. Biletlərin bir çoxu satılıb. Hazırda qiyməti 100 - 300 manat olan biletlər satışda var.
İyulun 2-də Sərhədçi İdman Olimpiya Mərkəzində Kickboks tədbiri təşkil olunucaq. “Qarabağ Zəfər Gecəsi”nin qonağı Türkiyənin aktyoru Burak Özçivit olacaq. Döyüşdən sonra aktyor öz heyranları ilə imza mərasimində görüşəcək. Biletlərin dəyəri 20 - 200 manat civarındadır.
Caz musiqisinin həvəskarları üçün iyulun 3-ü və 15-də Dövlət Akademik Musiqili Teatrında “Lara Martin's Jazz Club” tamaşası nümayiş olunacaq. Tamaşa Aleksandr Ostrovskinin “Cehizsiz qız” pyesi əsasında hazırlanıb. Biletlərin qiyməti: 35 - 50 manat.
4 - 9 iyulda uşaqlar üçün yay düşərgəsi olan Mega Summer təşkil olunacaq. Hər gün aktiv proqramlar, teatr tamaşaları, ekskursiyalar, pikniklər, ColorFest keçiriləcək. 4 dəfə qidalanma və gecələmə ilə qiymət 130 manat təşkil edəcək.
Üzeyir Hacıbəylinin musiqili komediyası olan «Arşın mal alan» iyulun 7-də Dövlət Akademik Musiqili Teatrının səhnəsinə qoyulacaq. Biletlərin qiyməti 6 - 10 manat arasında dəyişir.
İyulun 12-də Tofiq Bəhramov adına Respublika stadionunda “Qarabağ” – “Lex” (Polşa) oyunu baş tutacaq. UEFA Çempionlar Liqasının I təsnifat mərhələsində keçiriləcək görüş saat 20:00-da başlayacaq. Biletlərin qiyməti 5 - 50 manat arasındadır.
“Life” mahnısı ilə məşhurlaşan rus pop müğənnisi Zivert iyulun 16-da Sea Breeze Resort-da konsert verəcək. Bu, ifaçının Bakıda keçiriləcək ilk böyük konsertidir. Biletlərin dəyəri 30 - 250 manat təşkil edir.
20 - 21 iyulda Yaşıl Teatrda Eyyub Yaqubovun konserti təşkil olunacaq. Tədbirdə “Big band"in bədii rəhbəri Fuad Musayev və müğənni Natavan Cəbizadənin canlı ifaları da yer alacaq. Musiqili gecədə iştirak etmək üçün 20 - 100 manata biletlər almaq mümkündür.
Türk pop musiqiçisi Kənan Doğulu iyulun 27-də sevənləri ilə Sea Breeze Resort-da görüşəcək. Konsert 19:00-da başlayacaq. Biletlərin dəyəri 30 - 300 manatdır.
Qeyd edək ki, tamaşaçılarda COVID-19 pasportunun və ya immun sertifikatının olması zəruridir. Adıçəkilən tədbirlərdə iştirak etmək üçün biletləri iticket.az saytından əldə etmək olar.
